पाँचथर । अर्को महिना आयोजना हुने ११ औं फाल्गुनन्द गोल्डकप प्रतियोगिताको प्रवद्धनको लागी फिदिम स्र्पोटिङ क्लबले आयोजना गरेको मैत्रीपुर्ण फुटबल खेलमा पाँचथरका कार्यालय प्रमुखको टिम विजयी भएको छ । शनिबार फिदिम मा.बिको खेलमैदानमा भएको खेलमा पत्रकार महासंघ पाँचथरको टिमलाई ५-० पराजित गर्दै पाँचथरका कार्यालय प्रमुखको टिम विजयी भएको हो । कार्यालय प्रमुखको टिमको जितमा शिक्षा इकाइ पाँचथरका कार्यालय प्रमुख युगमणि सबेहाङले ह्याट्रिक गरे । पत्रकारको तर्फबाट गोलका केहि अवसरहरु सदुपयोग हुन नसक्दा टोली पराजित हुन पुग्यो ।
पाँचथरका कार्यालय प्रमुखको टिमको जितमा शिक्षा इकाइ पाँचथरका कार्यालय प्रमुख युगमणि सबेहाङले ३ गोल र जिल्ला प्रहरी कार्यालय पाँचथरका सुचना अधिकारी बिनालाल शाह तेली र डिभिजन वन कार्यालय पाँचथरका जमानपसिं मोक्तानदे समान १ गोल गरे । मैत्रिपुर्णखेलमा सहभागि भएका दुबै टोलीका क्याप्टेनहरुलाई आयोजकले मायाको चिनो प्रदान गरेका थिए ।
६ वर्ष पछि फाल्गुनन्द गोल्डकपको नयाँ संस्करण आयोजना हुन लागेकाले प्रतियोगिताको प्रचार तथा प्रवद्धनमा सहयोग होस भन्दै खेलको आयोजना गरेको फिदिम स्पोर्टिङ क्लबका अध्यक्ष दिपेन्द्र थापा मगरले बताए । फाल्गुनन्द गोल्डकपको ११ औं संस्करण आगामी पुस ६ गतेबाट १५ गते सम्म फिदिममा आयोजना हुँदैछ ।
