काठमाडौं । नेपालले कुवेतमा खेल्ने विश्व कप २०२२ र एसिया कप २०२३ को छनोटका सबै तीन खेल कान्तिपुर टेलिभिजनले प्रत्यक्ष प्रसारण गर्ने भएको छ ।
प्रत्यक्ष प्रसारणका लागि अखिल नेपाल फुटबल संघ (एन्फा) र कान्तिपुर टेलिभिजनबीच मंगलबार सम्झौता भएको । एन्फाका महासचिव इन्द्रमान तुलाधर र कान्तिपुर टेलिभिजनका मार्केटिङ हेड गौरी दाहालले सम्झौता पत्रमा हस्ताक्षर गरेको एन्फाले जनाएको छ । त्यसको बजार व्यवस्थापनको जिम्मा ए डी रिलिजले गर्ने बताइएको छ ।
नेपाली टोलीले जेठ २० गते चाइनिज ताइपेइ, जेठ २४ गते गते जोर्डन र जेठ २८ गते अष्ट्रेलियासँग प्रतिस्पर्धा गर्नेछ । जाबेर अल हमाद रंगशालामा हुने सबै खेल नेपाली समय अनुसार राती ९:४५ बजे सुरु हुनेछ । कोरोना महामारीका कारण नेपालले दशरथ रंगशालामा खेल्नु पर्ने खेल न्यूट्रल भेन्यूका रुपमा कुवेत सारिएको थियो । सोही समूहमा रहेको कुवेतसँग भने नेपालले यसअघि नै खेलिसकेको छ ।
शनिबार इराकसँग मैत्रीपूर्ण खेल खेलेको नेपाली टोली त्यहाँबाट स्थलमार्ग हुँदै आइतबार कुवेत पुगेको थियो । कुवेत पुगेपछि गरिएको पिसिआर टेष्टमा २३ खेलाडीसहित सबै ३५ जनाको नेगेटिभ रिपोर्ट आएपछि टोलीले सोमबार प्रशिक्षण पनि गरेको थियो । नेपालले इराकसँगको खेल ६–२ ले गुमाएको थियो । पहिलो हाफमा एक समय अञ्जन विष्ट र मनीष डाँगीको गोलमा २–१ को अग्रता बनाएपनि पछि भने सम्हालिन सकेन ।
विश्व कप छनोटमा कुवेतसँग दुवै खेल भने नेपालले खेलिसकेको छ । कुवेतसँग पहिलो खेलमा उसकै मैदानमा ७–० को हार बेहोरेको नेपालले भुटानमा भएको खेलमा १–० ले गुमाएको थियो । दशरथ रंगशाला पूर्न निर्माणको कार्य भइरहेको बेला न्यूट्रल भेन्यूका रुपमा नेपाल र कुवेतले भुटानमा खेलेका थिए ।
छनोटको अन्य अवे खेलमा चाइनिज ताइपेलाई अन्जन विष्टको २ गोलमा २–० ले हराएको नेपालले अष्ट्रेलियासँग ५–० र जोर्डनसँग ३–० को पराजय भोगेको थियो । नेपाल अहिले अंक तालिकामा ३ अंकका साथ चौथो स्थानमा छ । नेपालको ५ खेलमा १ जित र ४ खेलमा हार बेहोरेको थियो। अंक तालिको पुछारमा रहेको ताइपेइले अंक जोड्न सकेको छैन । अष्ट्रेलिया १२ अंकका साथ शीर्षस्थानमा छ भने कुवेत र जोर्डनको समान १० अंक छ ।
अंक तालिकाको चौथो स्थानमा रहँदै छनोट चरण सकेको खण्डमा नेपालले एसियन कप छनोटको तेस्रो राउन्डमा सोझै स्थान बनाउने अवसर रहनेछ । विश्वकपमा छनोट हुने नेपालको सम्भावना भने गणितीय रुपमा मात्र बाँकी छ ।
हाम्राेखेलकुद डटकमबाट साभार
