तेह्रथुम । आठराई गाउँपालिका ४ स्थित तमोरनदीको पिनासी घाटमा सडेगलेको अवस्थामा पुरुषको शव फेला परेको छ । पिनासी घाटको पश्चिमतर्फको किनारामा मंगोलियन अनुहार भएका अन्दाजी २०/२५ वर्षीय पुरुषको साेमबार शव फेला परेको ईलाका प्रहरी कार्यालय आठराईका प्रहरी निरीक्षक विद्या सागर मेहताले बताए ।
शवलाई नदी किनारको ढुंगाको चेपमा स्थानीयले फेला पारी प्रहरीलाई खबर गरेका थिए । मृतकको शरीरमा औंसा परेको र छालासमेत पिल्सिएको प्रहरीले जनाएको छ ।
मृतकको पहिचान भने हुन सकेको छैन । शवलाई पोस्टमार्टमका लागि प्राथमिक स्वास्थ्य केन्द्र संक्रान्ती बजारमा ल्याइएको प्रहरीले जनाएको छ ।
